Во рамките на кампањата „Учи паметно, работи стручно“ компанијата Макпрогрес заедно со гимназијата Ванчо Прке од Виница одржаа Отворен ден на кој учениците од завршните одделенија од основното училиште Гоце Делчев од Виница имаа можност да се запознаат со образовните профили коишто ги нуди средното општинско училиште во новата учебна година, а истите се барани на пазарот на трудот.
Во просториите на новиот иновативен развоен центар во рамките на Фондација Прогресив Академија се одржа Отворен ден за промоција на компанијата Макпрогрес за хемиско-технолошката струка и дуалното образование. На настанот се разговараше за поволностите и придобивките кои ќе ги имаат учениците кои што ќе се одлучат да се запишат на прехранбената струка. За учениците од оваа струка компанијата Макпрогрес широко ќе ги отвори своите врати и ќе ги запознае со основните процеси на кондиторското производство преку практични примери од реално опкружување, ќе им овозможи на учениците сами да развиваат нови производи во пилот постројката која ќе биде дел од фондацијата Прогресив Академија, како и можности за вработување по завршување на учењето.
На настанот свое обраќање имаа Орце Павлов, професор по македонски јазик и литература од СОУ „Ванчо Прке“-Виница, Маја Цветанова, маркетин менаџер, Александра Кирилова, директор на фондација Прогресив Академија, Марија Михаилова, менаџер за контрола на квалитет, Трајче Димитровски, специјалист за сензорика и координатор за дуално образование, Александра Трајкова, технолог во сектор за истражување и развој и Александра Ефтимов, менаџер на сектор за истражување и развој.
Отворениот ден е можност идните ученици да остварат непосредна комуникација со наставниот кадар и директно да се запознаат со различните активности, проектите и условите за учење во училиштето и практичната работа во компанијата. Воедно, на учениците им беше претставен и проектот “Учи паметно, работи стручно” како и можните придобивки кои ги нуди дуалното образование во соработка со бизнис компаниите од реалниот сектор во регионот.
